कानून बमोजिमको काम नगरेपछि, स्थापित मापदण्डलाई लत्याएपछि, ऐन र नियमको बर्खिलापमा मनमौजी काम गरेपछि प्रणालीले काम गर्दैन। प्रणाली व्यक्तिको हातमा पुगेपछि उसै अस्तव्यस्त हुन्छ र त्यसलाई लयमा फर्काउन र नियमको ढाँचामा हिडाउन मेहनत गर्नै पर्छ। हो, अहिले सरकारी अड्डा हाकिमको नभएको तजबिजी अधिकार प्रयोग गराईले थिलिएका छन्। विधि र पद्दतीको हुर्मत लिईएको छ र त्यो हुर्मतलाई ध्वस्त पार्न र विधि पद्दतिको अनुसरण गराउन एक थान सुब्बा सडकमा ओर्लिएका छन्।  

सिंहदरबारमा नारा अंकित कालै लुगा लगाएर भद्र आन्दोलन हुँदै, सिङ्गदरबार भित्रै अर्धनग्न भएर आन्दोलन गर्ने स्वतन्त्र निजामति कर्मचारी संगठनका संयोजक पशुपति पोखरेल फेरि एकपटक विधि सम्झाउन र मापदण्ड सम्झाउन सडकमा झरेका हुन्। नायव सुब्बा पोखरेल विधिलाई टेबुलमा राखेर त्यसैको बर्खिलाप गर्ने अड्डा र त्यसका हाकिमलाई सम्झाउन थालेका छन्। 

आफ्नै तहका, आफू भन्दा माथिल्लो तहका जो सुकै हुन् अन्यायमा परेकालाई काँध हालेर हिड्ने उनले यस अघि धेरैको पक्षमा आवाज बुलन्द गरे। आफ्नो व्यक्तिगत स्वार्थलाई पन्छाएर कर्मचारीको हक हितका लागि बोल्दा धेरै पटक घन्टाका दरले प्रहरीको नियन्त्रणमा पनि पुगे। तर उनले लत्तो छोडेनन् र त अहिले कतै विधि मिचियो भने पशुपतिको खोजखाज हुन थालेको छ। 

अहिले तिनै पोखरेल पर्यटन विभाग केन्द्रित आन्दोलनमा छन। हिमाल आरोहण गर्न जानेका रेखदेख लगायतको सम्पूर्ण लगत् राख्न विभागले कर्मचारी खटाउँछ। खटिएका कर्मचारीले आकर्षक सुविधा पाउँछन्। सुबिधा आकर्षक हुने भएपछी जान खोज्नेको भिड लाग्नु स्वाभाविक नै पनि हो। घुम्न, डुल्न पनि पाईने चार पाँच महिनामा प्राप्त हुने तलब एकै पटक हिमाल जाँदा प्राप्त हुने भएपछी लियाजो अफिसर हुन अपहत्ते हुने नै भयो। तर, मनलाग्दी पाराले विधि र थिति लत्याएर नाता कुटुम्ब देखि लिएर अनेक खुल्ने र नखुल्ने सम्बन्धमा जोडिएकालाई हिमाल पठाउन थालेपछि पशुपतिले सडकमा ओर्लिएर विधि सम्झाऊनु परेको हो। 

पर्यटन विभागमा हालसालै पुगेका महानिर्देशकलाई १० बुंदे माग बुझाएका उनले थिति बसाल्न उनै महानिर्देशक रुद्रप्रसाद पण्डितलाई आग्रह गरेका छन्। पोखरेलले पण्डितलाई जिम्मा लगाएको मागका बुँदा पूरा गराउन पशुपतिलाई जुरुक्कै बोक्न कर्मचारीको ठूलो डफ्फा तयार भईसकेको बुझिएको छ। १० बुँदे माग पूरा नहुँदा सम्म हरेक दिन ११ बजे देखि १:३० सम्म पर्यटन विभागमा पोखरेलको कप्तानीमा धर्ना दिने काम भई रहेको छ।