नेपाल कानुन समाजका अध्यक्ष एवं पूर्वमुख्यसचिव स्वर्गीय तीर्थमान शाक्यको बहुआयामिक ब्यक्तित्वबारे आज चर्चा गरिएको छ । नेपाल कानुन समाजद्वारा आज आयोजित श्रद्धाञ्जली सभामा सहभागी वक्ताहरुले कानुन मम्यौदा, सार्वजनिक प्रशासन, सवैधानिक अङ्ग र समाजसेवामा उनले पुर्‍याएको योगदानबारे प्रकाश पारे  । 

उनको यही वैशाख ६ गते ८१ वर्षको उमेरमा निधन भएको थियो । उनी लोक सेवा आयोगको पूर्वअध्यक्ष तथा रोटरी क्लब नेपालको डिष्ट्रिक गभर्नरसमेत थिए  ।  सो अवसरमा सर्वाेच्च अदालतका पूर्वप्रधानन्यायाधीश कल्याण श्रेष्ठले कानुनमा रुपान्तरण र कानुनी शरीर विज्ञानको विशेषज्ञ एवं खम्बका रुपमा स्व शाक्यको योदानलाई स्मरण गर्न सकिने बताए । उनले भने, “मुलुकको कानुन तर्जूमाको अधिकारिक व्यक्तिका रुपमा रहेका शाक्य समाजसेवा, कानुन, सार्वजनिक प्रशासन र संवैधानिक अङ्गलाई नेतृत्व प्रदान गर्ने बहुआयामिक व्यक्तित्व थिए।”

सर्वाेच्च अदालतका न्यायाधीश टेकप्रसाद ढुङ्गानाले कानुन मस्यौदा निर्माणमा निपूर्ण शाक्य अदालतको फैसलामा गुणस्तरता कायम गर्न तथा न्यायनिरुपणलाई कसरी शीघ्रता गर्न सकिन्छ भन्नेमा सदासर्वदा आफूलाई राय सुझाव प्रदान गर्दै आएको घटना सुनाए ।  उनले भने, “सकारात्मक सोच, स्पष्ट वक्ता, तथस्थता र निष्पक्षताका पुजारी पूर्वमुख्यसचिव शाक्य नेपालको कानुनी क्षेत्र र सार्वजनिक प्रशासनका क्षेत्रमा विज्ञताको प्रतिमूर्तिका रुपमा रहनुभएको थियो ।”

पूर्वमन्त्री माधव पौडेलले इजलास सहायकदेखि मुख्यसचिवसम्मको जिम्मेदारीमा रही स्व शाक्यले पेशाप्रति निष्ठाको प्रतीकका रुपमा आफूलाई स्थापित गराउन सफल हुनुभएको प्रतिक्रिया दिए । उनले भने, “सरल, सालिन र स्पष्ट व्यक्तारुपमा रहनुभएका पूर्वमुख्य सचिव शाक्य कानुनको गुणस्तरीय मस्यौदा निर्माणका माध्यमद्वारा मुलुकलाई ठूलो गुनलगाउनुभएको छ ।” अर्का पूर्वमन्त्री अग्निप्रसाद खरेलले विधि र लोकतन्त्र बुझेका शाक्य पञ्चायतदेखि गणतन्त्रसम्म बनेका संविधान र कानुन मस्यौदाका ज्ञाता मात्र नभई निष्ठा, इमान र देशभक्त रहनुभएको बताए  । ललितपुर  महागरपालिकाका प्रमुख चिरीबाबु महर्जनले स्व शाक्यले गर्न सक्ने विषयवस्तु मात्र बोल्न र पोखरी, पार्टी, पौवा जस्ता सम्पदाको संरक्षण गर्न दिएको सल्लाहलाई आफूले सधै शिरोधार्य गर्दै आएको बताए ।

सो अवसरमा नेपाल कानुन समाजका कार्यकारी निर्देशक कृष्णमान प्रधान, वरिष्ठ अधिवक्ता पुष्पा भुसाल र कानून,न्याय तथा संसदीय मामिला मन्त्रालयका सचिव फणिन्द्र गौतमले सार्वजनिक प्रशासन र संवैधानिक कानूनको क्षेत्रमा लामो समयसम्म काम गर्दा कुनै प्रश्नचिन्हको घेरामा नपर्नुभएका अध्ययनशील, शालिन र शिल्पी हुनुहुन्थ्यो भने  ।

स्व शाक्यका परिवार जनका अतिरिक्त श्रद्धाञ्जली सभामा सर्वाेच्च अदालतका पूर्वन्यायाधीशहरु, उच्च अदालतका न्यायाधीश, वरिष्ठ अधिवक्ता र अधिवक्ता, पूर्वमुख्य सचिव, सचिव तथा समाजका विभिन्न क्षेत्रका व्यक्तिहरु उपस्थिति थिए।