मधेश प्रदेशका मुख्यमन्त्री सरोजकुमार यादवले विश्वासको मत नपाएपछि त्यहाँको सरकार ढलेको छ। अब मधेश प्रदेशमा जनमत पार्टीको नेतृत्वमा संघीय सत्ता गठबन्धनअनुकूलकै सरकार बन्ने पक्कापक्की भएको छ। प्रधानमन्त्री प्रचण्ड र एमाले अध्यक्ष केपी ओलीको डिजाईनमा उपेन्द्र यादवलाई देखाईदिन जनमतलाई मुख्यमन्त्री दिएरै सरकार बनाउने योजना साकार हुने भएको हो। 

नेकपा एमाले, जनमत पार्टी, नेकपा माओवादी केन्द्र, नेकपा एकीकृत समाजवादी पार्टी, नागरिक उन्मुक्ति पार्टी र केही साना दलको समेत गरी ५६ जनाको समर्थनमा मुख्यमन्त्रीमा जनमतका संसदीय दलका नेता महेशकुमार यादवलाई अघि सार्ने तयारी छ।

सत्ता गठबन्धनका तर्फबाट महेशकुमार यादवले प्रदेश प्रमुखसमक्ष मुख्यमन्त्रीमा दाबी पेस गर्नेछन्। प्रदेश प्रमुख सुमित्रा सुवेदी भण्डारीले नयाँ सरकार बनाउन आह्वान गरेपछि दाबी पेस गर्ने तयारी छ। भण्डारी ओलीको सिफारिशमा प्रदेश प्रमुख नियुक्त भएकी हुन्। 

बुधबार प्रदेश सभामा विश्वासको मत नपाएपछि मुख्यमन्त्री सरोजकुमार यादव कामचलाउ बन्न पुगेका छन्। गठबन्धनमा रहेका चार दलका साथै एक स्वतन्त्र र एक संघीय समाजवादी पार्टीका सांसदले पनि समर्थन गरेका छन्। जनमतका महेशलाई मुख्यमन्त्री बनाउन ५६ सांसदले हस्ताक्षर गरिसकेका छन्। 

जनमतका नेताहरूका अनुसार, जनमतका महेश मुख्यमन्त्री भएपछि माओवादी केन्द्रले आर्थिक मामिला मन्त्रालय लिने सहमति जुटिसकेको छ।अन्य मन्त्रालय एमाले, एकीकृत समाजवादी, नागरिक उन्मुक्ति र जनमतलाई न्यायोचित विभाजन गर्ने नेताहरू बताउँछन्। नयाँ बन्ने सरकार ले जेठ २८ गते विश्वासको मत लिने छ। आज विश्वासको मत लिने कार्यक्रम सारेर जेठ २८ मा लिने ब्यबस्था मिलाउन सरोजले सभामुखलाई पत्र पठाएका थिए। तर उनको पत्र सभामुखले च्यातिदिएका थिए।  महेश मधेशको उपेन्द्र यादव ईतर पार्टी बाट मुख्यमन्त्री बन्ने पहिले व्यक्ति भनेका छन् भने उनी मधेशको तेश्रो मुख्यमन्त्री बन्ने भएका छन्।