संसद सचिवालयका कर्मचारीले गरेको आन्दोलन प्रतिनिधिसभाको बैठक सम्म पुगेको छ।  शुक्रबारको बैठकमा कांग्रेस सांसद रामहरि खतिवडाले सचिवालयका कर्मचारीको माग पूरा गराउन माग गरेका थिए। 

आजको बैठकमा नेकपा एमालेका सांसद रघुजी पन्तले संसद सचिवालयमा कार्यरत कर्मचारीले अतिरित्त समयमा गरेको कामको भत्ता नपाएको भन्दै सरकारको ध्यानाकर्षण गराएका छन् । प्रतिनिधि सभाको बैठकको आकस्मिक समयमा बोल्दै सांसद पन्त भत्ताको माग गर्दै केही दिनदेखि कर्मचारीले आन्दोलन गरिरहेकोतर्फ सरकार गम्भीर हुनपर्ने बताए ।

‘उहाँहरूले हिजोको भत्ता माग्नुभएको छैन। कमसेकम अब अतिरिक्त समयमा काम गरेको भत्ता त पाउनुपर्‍यो। अर्थमन्त्रालय लगायत अन्यत्रका कर्मचारीले पाउने, संसदका कर्मचारीले किन नपाउने ?,’ उनले प्रश्न गरे, ‘आज म देखिरहेको छु, सभामुखलाई सहयोग गर्न सबै कर्मचारी हुनुहुन्न, बाहिर धर्नामा हुनुहुन्छ। संसदभित्र यो दृश्य देखिनु आफैमा दु:खद हो कि होइन ?’

सांसद पन्तले संसद्मा सांसदहरुले पढनका लागि भनेर आउने गरेको पत्रिका कटौती भएकोबारे जवाफ पनि माग गरेका छन् । उनले देशको अर्थतन्त्र पत्रिका किन्न नसकिनेगरि बिग्रिएको हो भन्दै प्रश्न गरे । उनले भने, ‘बाहिर सांसदहरूलाई पढ्न भनेर जतिपनि अखबारहरू राखिन्थ्यो, अहिले त्यो पनि कटौती भएको छ । के हाम्रो मुलुकको आर्थिक अवस्था त्यति कमजोर भएको हो ? सांसदहरंलाई दिने पत्रिकापनि कटौती गर्ने अवस्थामा पुगेको हो र ?’

सभामुखले हिजै मात्र सचिवालयका कर्मचारीको मागका सम्बन्धमा बैठक गरेका थिए। अर्थमन्त्री समक्ष कुरा राखेर सचिवालयका कर्मचारीको माग पूरा गराउने सभामुखले प्रतिवद्दता व्यक्त गरेका छन्।