संसद् सचिवालयका कर्मचारीका मागका सम्बन्धमा प्रधानमन्त्री प्रचण्डको रोहबरमा समिति बनाएपछि कर्मचारीले आन्दोलन रोकेका छैनन्। 
आन्दोलनरत संसद् सचिवालयका कर्मचारीले संघीय संसद् भवन नयाँ बानेश्वरमा प्रदर्शन गरेका छन्। सेवा सुविधा थपको मागसहित आन्दोलनमा उएिका संघीय संसद् सचिवालयले हातमा कालोपट्टी बाँधेर विरोधमा उत्रिएका हुन्।

कर्मचारीहरूले संसद् भवनकै परिसरमा आन्दोलन चर्काएपछि बिहान ११ बजेका लागि बोलाइएको प्रतिनिधिसभा बैठक अझै सुरु हुन सकेको छैन। आजको बैठकमा सरकारले ल्याएको आगामी आर्थिक वर्षको बजेट पारित गर्ने तयारी छ।

प्रधानमन्त्री निवास बालुवाटारमा आज (आइतबार) बसेको शीर्ष बैठकले संसद् सचिवालयका महासचिव पद्मप्रसाद पाण्डेय र अर्थसचिव मधुकुमार मरासिनी सदस्य रहने गरी समिति गठन गरेको छ। सो समितिले कर्मचारीको माग सम्बोधनका लागि वार्ता अघि बढाउने बताइएको छ।

कर्मचारीले भने बजेट पास हुनु अघि नै आफ्ना माग पूरा गर्नु पर्ने बताएका छन्।