सोसल मिडिया
युनिकोड
एमाले अध्यक्ष केपी शर्मा ओली प्रधानमन्त्रीमा नियुक्त भएका छन्। उनले आजै प्रधानमन्त्रीको सपथ लिएर कार्यभार सम्हाल्दै छन्। उनको क्याबिनेटमा उनकै पार्टीका राजकुमार गुप्ता सङ्घीय मामिला तथा सामान्य प्रशासन मन्त्री बन्ने पक्कापक्की भएको छ। उनले पनि आजै सपथ लिएर कार्यभार सम्हाल्ने भएका छन्।
७७ वटा जिल्ला समन्वय समिति, ६ वटा महानगरपालिका, ११ उपमहानगरपालिका, २७६ नगरपालिका र ४६० गाउँपालिका गरी जम्मा ७५३ स्थानीय तहको क्षमता विकास र सहजीकरण एवम् समन्वयको कार्य सम्पादन गर्दै आएको मन्त्रालय पर्साका गुप्ताले सम्हाल्ने टुंगो लागेको हो।
एमालेले सामान्य प्रशासन मन्त्रालय लिन पहिल्यै बाट जोड गर्दै आएको थियो। सङ्घीय निजामति सेवा ऎन आफ्नै पालामा जारी गर्ने उसको योजना छ।
को हुन् गुप्ता ?
भौराटार ६, पर्सामा बुबा हिरालाल प्रसाद र आमा शान्ति देवीका सन्तानका रुपमा २०२७ चैत २० गते जन्मिएका राजकुमार गुप्ता हाल बहुदरमाई ७ , पर्सामा बसोबास गर्छन। पर्सा निर्वाचन क्षेत्र नम्बर ३ बाट निर्वाचित उनी पार्टी अध्यक्ष तथा प्रधानमन्त्री ओलीका अति प्रिय पात्र हुन्। उनले बीकम सम्मको अध्ययन पूरा गरेका छन्।
२०४२ देखि अखिलबाट राजनीति सुरू गरेका उनले २०५१ मा युवा संघको विभिन्न पदमा काम गरेका थिए । एमालेको जिल्ला सदस्य हुँदै २०६६ मा पर्सा क्षेत्र नं. ३ को अध्यक्ष बनेका उनी लोकतान्त्रिक मधेसी संगठनको केन्द्रीय महासचिव पनि भए एमालेको १० औं महाधिवेशन सौराहाबाट केन्द्रीय सदस्य निर्वाचित भएका थिए । २०७० को दोस्रो संविधानसभा सदस्यमा निर्वाचित भएका उनी २०७४ मा पराजित भए भने २०७९ मा निर्वाचित भएर अहिले मन्त्री नियुक्त भएका हुन्।
कांग्रेसका सुरेन्द्रप्रसाद चौधरीलाई १५१ मतले पराजित गर्दै राजकुमार विजयी भएका हुन् । २४ हजार २६० मत ल्याएर उनी प्रतिनिधि सभा सदस्यमा निर्वाचित हुँदा सुरेन्द्रले २४ हजार १०९ मत पाए ।
