सोसल मिडिया
युनिकोड
ओली नेतृत्वको सरकारले निमित्त मुख्यसचिव लिलादेवी गड्तौलालाई कायममुकायम मुख्यसचिवको जिम्मेवारी दिएको छ ।
सोमबार बसेको केपी ओली नेतृत्वको पहिलो मन्त्रिपरिषद् बैठकले हाल निमित्त मुख्यसचिव रहेकी गड्तौलालाई कायममुकायम मुख्यसचिव बनाउने निर्णय गरेको हो ।
नेपालको इतिहासमा उनी पहिलोपटक पूर्ण जिम्मेवारीसहितको पहिलो कामु मुख्य सचिव बनेकी छन् ।
प्रधानमन्त्री ओली र कामु मुख्यसचिव लिला दुबै तेह्रथुममा जन्मिएकी हुन् । चेली भनेर सम्बोधन गर्ने लीलालाई जिम्मेवारी दिएर ओलीले उनलाई पहिलो महिला कामु मुख्यसचिव बन्ने सौभाग्य मिलाईदिएका छन् । उनी भदौ १५ सम्म कामु मुख्यसचिवको जिम्मेवारीमा रहनेछिन् ।
को हुन् गड्तौला ?
गड्तौला प्रधानमन्त्री तथा मन्त्रिषरिषद् कार्यालयमै कानुन सचिवको रूपमा कार्यरत थिइन्। २०५२ सालमा शाखा अधिकृतको रूपमा निजामती सेवामा प्रवेश गरेकी उनी २०६३ कात्तिक ३ गते उपसचिव र २०७० माघ ९ गते सहसचिव बनेकी थिइन्।
२०७७ कात्तिक २७ गतेदेखि उनी सचिवको रूपमा कार्यरत छिन्। कानुन समूहका प्रायः अधिकृत न्यायाधीशले बन्ने अवसर पाउँछन्। गड्तौलाले भने न्यायाधीशमा रूचि नदेखाएको उनका समकालीनहरू बताउँछन्।
गड्तौला कानुन तर्जुमा र लैंगिक न्यायका विषयमा विशेष दख्खल राख्छिन्। न्याय सेवा आयोगको अभिलेखअनुसार उनको स्थायी ठेगाना सोलुखुम्बु हो। उनका श्रीमान् मात्रिका निरौला वरिष्ठ अधिवक्ता छन्। उनले कानुनमा स्नातकोत्तर (एलएलएम) सम्म अध्ययन गरेकी छन्।
गड्तौला आउँदो भदौबाट ५८ वर्षे उमेर हदले अवकाश पाउँदै छिन्।
