उपप्रधानमन्त्री तथा परराष्ट्रमन्त्री नारायणकाजी श्रेष्ठले लगानी सम्मेलनबाट नेपाल विश्वका लगानीकर्ताहरूका लागि उदीयमान गन्तव्यका रूपमा सन्देश प्रवाह भएको बताएका छन् । 

तेस्रो नेपाल लगानी शिखर सम्मेलनको समापन सत्रमा आज सम्बोधन गर्दै उनले लगानी प्रवद्र्धनका लागि नेपालसँग द्विपक्षीय लगानी सम्झौता टुङ्ग्याउन पनि मित्रराष्ट्रहरूलाई आग्रह गरे । “हामीले सफलताका कथाहरूको प्रत्यक्ष कथा सुन्यौँ । 

हामीले नेपालमा प्रगतिशील लगानी–मैत्री वातावरणको एक सिंहावलोकन प्रदान गर्न सक्दो प्रयास गरेका छौँ । व्यापारिक घराना तथा सङ्घसंस्थाहरुबीच विभिन्न समझदारी र समझदारीपत्रमा हस्ताक्षर भएको छ,” उनले भने, “त्यसैगरी, हामीले प्रस्तावमा रहेका विभिन्न परियोजना प्रदर्शन गरेका छौँ र अर्थतन्त्रका विभिन्न क्षेत्रमा उपलब्ध लगानीको सम्भावना र अवसरका बारेमा चर्चा गरेका छौँ । तीमध्ये सरकार र विपक्षी दलका नेताहरूबाट हामीले उच्च राजनीतिक आश्वासनहरू देखेका छौँ ।”

यसैगरी, उपप्रधानमन्त्री श्रेष्ठले यी सबै प्रमाणले नेपाललाई लगानीको आकर्षक गन्तव्य बन्ने स्पष्ट सन्देश दिँदै सोही दिशातर्फ उन्मुख गरेको बताएका छन्  । उनका अनुसार हालका वर्षमा धेरैजसो राजनीतिक आकाङ्क्षाहरू पूरा गरिसकेपछि नेपालीको दीर्घकालीन विकास र समृद्धिको आकाङ्क्षालाई साकार पार्न उच्च आर्थिक वृद्धिको बाटोतर्फ सरकार अघि बढिरहेका छ । “तसर्थ आर्थिक विकास र समृद्धि देशको मुख्य ऐतिहासिक कार्य हो जसमा सरकार पूर्णरूपमा प्रतिबद्ध छ,” उनले भने  ।

नेपालले सन् २०२६ मा एलडिसीको स्थितिबाट स्तरोन्नति भई सन् २०३० सम्ममा मध्यम आय भएको मुलुकको दर्जा हासिल गर्ने लक्ष्यलाई पछ्याउँदै एसडिजीसहित अन्तर्राष्ट्रिय रूपमा प्रतिबद्ध विकास लक्ष्यहरू हासिल गर्न प्रयासरत रहेकाले आर्थिक वृद्धि पनि महत्वपूर्ण हुनेमा उनको जोड छ ।

“हामीले उच्च लगानी आकर्षित गर्ने लक्ष्य राखे पनि, यस्तो लगानी लगानीकर्ता र साझेदारहरूका लागि पनि पारस्परिक रूपमा लाभदायक हुनुपर्छ भन्नेमा हामी सचेत छौँ,” उपप्रधानमन्त्री श्रेष्ठले भने, “तसर्थ, हामी सम्पूर्ण व्यापार चक्रका लागि कुशल र प्रभावकारी सहजीकरणका साथसाथै लगानी, प्रतिफल र फिर्ताको अधिकतम सुरक्षा र सुरक्षा सुनिश्चित गर्दै हाम्रा लगानीकर्तालाई गतिशील लगानी परिदृश्य प्रदान गर्ने लक्ष्यका साथ काम गरिरहेका छौँ ।”

सरकारले विभिन्न ऐन संशोधन गर्दै अध्यादेश जारी गरेको भन्दै उहाँले दुई साताअघि मात्रै मोडल फ्रेमवर्क द्विपक्षीय लगानी सम्झौता (बिआइए) लाई स्वीकृत गरी चासो दिने मुलुकसँग द्विपक्षीय लगानी सम्झौताको बाटो खुला गरेको स्पष्ट पारे । 

“नेपाल इन्भेस्टमेन्ट समिटको यो तेस्रो एपिसोडले नेपाललाई विश्वका लगानीकर्ताका लागि उदीयमान गन्तव्यका रूपमा देखाउने मञ्च भएको मलाई विश्वास छ,” उनले भने, “यो शिखर सम्मेलन नेपाललाई लगानीको प्रमुख गन्तव्यमा परिणत गर्ने सरकारको अटल प्रतिबद्धताको प्रमाण हो ।” उनले  असल मित्र र साझेदारहरूले नेपालमा लगानी बढाउन, हाम्रो पारस्परिक लाभका लागि हाम्रो सहयोगलाई अझ फराकिलो र गहिरो बनाउने हाम्रो प्रयासमा सहयोग गर्ने अपेक्षा व्यक्त गरे ।