सुशासनको प्रत्याभूति गराउने भाषण गर्दै आएका प्रधानमन्त्री केपी शर्मा ओलीले कर्मचारीको खाजा समय छोट्याउन निर्देशन दिएका छन् ।

सरकारले सरकारी कार्यालयहरूमा खाजा समय आधा घण्टाभन्दा बढी नतोक्न निर्देशन दिएको हो ।

प्रधानमन्त्री तथा मन्त्रिपरिषद्को कार्यालयले मन्त्रालय, आयोग, सचिवालय र निकायहरूलाई परिपत्र गर्दै खाजा समय दिउँसो १ः३० देखि २ बजेसम्म मात्रै छुट्याएर कार्यान्वयन गर्न निर्देशन दिएको हो ।

१२ पुस २०८० को मन्त्रिपरिषद्को निर्णयअनुसार २९ माघ २०८० मा प्रकाशित राजपत्रले सबै सरकारी कार्यालयको खाजा समय तोकेकाले त्यसअनुसार नै गर्न पत्रमा भनिएको छ ।

मन्त्रिपरिषद्को निर्णयअनुसार तोकिएको खाजा समयबारे सूचना सूचना पाटीमा टाँस्ने र अन्य समयका सेवा प्रवाह र कार्यालयको काम नरोक्ने व्यवस्था गर्न सम्बन्धित कार्यालय प्रमुखले मिलाउनुपर्ने परिपत्रमा उल्लेख छ ।

पत्रमा अनुगमनका क्रममा कतिपय निकायमा खाजा समय तोकिएभन्दा बढी निर्धारण गरिएको र खाजा समय पालना नभएको प्रधानमन्त्री कार्यालयले जनाएको छ ।

खाजा समय छोट्याएपछी कर्मचारीले अब सट्याकसुटुक खाजा खाईसक्नु पर्ने भएको छ।