एएफसी यु–२० एसियन कप छनोटको समूह ‘बी’ अन्तर्गतको खेलमा नेपालले आज बहराइनसँग प्रतिस्पर्धा गर्दैछ ।
चाइनाको ताइपेइस्थित जेन क्याथोलिक युनिभर्सिटी स्टेडियममा भइरहेको नेपाल र बहराइनबीचको खेल नेपाली समय अनुसार दिउँसो पौने १ बजे सुरु हुनेछ ।

समूह बी मा नेपालले यसअघि तीन खेल खेल्दा १ खेल जितेको थियो भने २ खेलमा पराजित भएको थियो । पाँच टोली सहभागी समूह ‘बी’ मा नेपाल ३ खेलबाट ३ अंकसहित चौथो स्थानमा छ । समूहको शीर्ष स्थानमा रहेर अर्को वर्ष चीनमा हुने एएफसी यु–२० एसियन कपमा छनोट हुने नेपालको सम्भावना सकिएको छ ।

यस समूहमा उज्वेकिस्तान दुवै खेल जितेर ६ अंकसहित शीर्ष स्थानमा छ । यस्तै ३ खेलबाट २ जित र एक हारको नतिजासहित ६ अंक जोडेको कम्बोडिया दोस्रो स्थानमा छ । दुई खेलमा एक जित र एक हारको नतिजा निकालेको बहराइन तीन अंकसहित तेस्रो स्थानमा छ ।