सत्ता गठबन्धनमा गनगन चलेकै बेला विपी पुत्र डा.शशांक कोइरालाले कांग्रेस सभापति शेरबहादुर देउवाले इच्छा ब्यक्त गरे मात्रै तथास्तु हुने बताएका छन्। 

आज नेपाल लोकतान्त्रिक खेलकुद संघको कार्यक्रमलाई सम्बोधन गर्दै कोइरालाले देउवा प्रधानमन्त्री बन्ने दिन नजिकिएको बताए। साथै उनले खेलक्षेत्रलाई माया गर्नु पर्नेमा जोड समेत दिए। 

कांग्रेसका पूर्वमहामन्त्री समेत रहेका कोइरालाले भने,‘गरिब राष्ट्र भएकाले हामीले खेलकुदलाई त्यति प्राथमिकता दिन सकेनौं । खेल महत्वपूर्ण जीवनको अंग हो। यसलाई हामीले महत्व दिनुपर्छ। म आदरणीय सभापतिलाई भन्न चाहन्छु, तपाईंले इच्छा प्रकट गर्नुहोस्, आउने दिनहरुमा तपाईं प्रधानमन्त्री बनिहाल्नुहुन्छ । खेललाई चाहिँ प्राथमिकतामा राख्नुहोला ।’