सिन्धुलीको कमलामाईमा माइक्रोवस दुर्घटना हुँदा १५ जना घाइते भएका छन्। 

काठमाडौँबाट १९ यात्रु लिएर विराटनगरतर्फ जाँदै गरेको बा ५ ख ६६१८ नम्बरको माइक्रो आज बिहान करिब साढे चार बजे सिन्धुीको कमलामाई नगरपालिका- ८ भिमान नजिकै  सिस्नेरीमा दुर्घटनामा परेको हो। 

दुर्घटनामा माइक्रो चालकसहित १५ जान घाइते भएका जिल्ला प्रहरी कार्यालय सिन्धुलीका एसपी गोविन्द पोखरेलले जानकारी दिए। 

‘घाइतेमध्ये ९ जनालाई थप उपचारको लागि बीपी कोइराला स्वास्थ्य विज्ञान प्रतिष्ठान धरान पठाइएको छ,’ एसपी पोखरेल भने, ‘बाँकी ६ जना घाइते स्थानीय स्वास्थ्य संस्थामा उपचारपछि अन्य सवारी साधनमा चढेर गन्तव्यतर्फ लागेका छन्।’

दुर्घटनामा माइक्रोबसका चालक अनुप सुन्दार पनि घाइते भएका छन्। घाइतेमध्ये तीन जनाको अवस्था गम्भीर रहेको प्रहरीले जनाएको छ। 

माइक्रोमा १९ जना सवार थिए। त्यसमध्ये चार जना सकुशल छन्। चालक निदाउँदा अथवा तीव्र गतिको कारण माइक्रो दुर्घटनामा परेको अनुमान प्रहरीले गरेको छ।