शासन सत्ताको बागडोर सम्हालेको एमालेको मुख्यालयमा दिउँसै लफडा भएको छ। सोही पार्टीका मूली केपी ओली देशको प्रधानमन्त्री छन् तर उनकै अड्डामा खुकुरी नचाएर ताण्डब देखाईएको छ। र त्यसरी आज शनिवार दिउँसै खुकुरी नचाउने कार्यकर्ताको पहिचान भएको छ । 

एमालेको जनवर्गीय संगठन लोकतान्त्रिक आदिवासी जनजाति महासंघको केन्द्रीय कमिटी बैठकअघि आज दिउँसो च्यासलमा दुई पक्षीय झडप भएको थियो । त्यसक्रममा पार्टीको बागमती प्रदेश कमिटी सदस्य तथा लोकतान्त्रिक आदिवासी जनजाति महासंघकी केन्द्रीय सचिव मन्दिरा श्रेष्ठले नाङ्गो खुकुरी नचाएकी हुन् ।

आज र भोलि दुई दिन बस्नेगरी महासंघले तेस्रो बैठकको आयोजना गरेको थियो । बैठक शुरु हुनुअगावै श्रेष्ठ एकाएक खुकुरी हल्लाउँदै निस्किएपछि भाँडभैलो मच्चियो । खुकुरी खोस्न प्रहरी सहायक निरीक्षक सरस्वती खनालले निकै प्रयास गरेको सार्वजनिक भएको  भिडियोमा देखिन्छ । 

झडपपछि बिथोलिएको बैठक अध्यक्ष तथा प्रधानमन्त्री ओली पुगेपछि ढिलो गरी शुरु भएको र दुई दिने बैठक आजै सम्पन्न भएको बुझिएको छ ।

महासचिव पेम्बा भोटे गुरुङ्गलाई अध्यक्ष पासाङ्ग शेर्पाले कारवाही गरेसँगै जनजाति महासंघमा लफडा छ। अध्यक्ष शेर्पा बहुबिबाहमा डामिएका व्यक्ति हुन्। उनैले भोटेलाई कारबाही गरेपछि मन्दिराले खुकुरी नचाएको बताईएको छ।