सोसल मिडिया
युनिकोड
नेकपा (एमाले)ले प्रधानमन्त्री एवं पार्टी अध्यक्ष केपी शर्मा ओलीको चीन भ्रमण सफल रहेको निष्कर्ष निकालेको छ ।
पार्टी कार्यालयमा मंगलबार बसेको एमाले सचिवालय बैठकले प्रधानमन्त्रीको चीन भ्रमणका क्रममा नेपालको दिर्घकालीन विकासमा सहयोग पुग्नेगरी सम्झौता र सहमति भएको भन्दै चीन भ्रमण सफल रहेको निष्कर्ष निकालेको उपमहासचिव प्रदीप ज्ञवालीले जानकारी दिए ।
बीआरआईका विषयमा भएका समझदारी निकै महत्त्वपूर्ण भएकाले यसको कार्यान्वयनमा लाग्नुपर्ने बैठकको निष्कर्ष रहेको ज्ञवालीले बताए ।
त्यस्तै, सचिवालय बैठकले स्थानीय तहमा भएको उपनिर्वाचनको समीक्षा गर्दै समग्रतामा थप उपलब्धि हासिल गरेको निष्कर्ष समेत निकालेको उनले जानकारी दिए । काठमाडौं–१६ र कीर्तिपुरको नतिजालाई गम्भीरतापूर्वक लिएको भन्दै ज्ञवालीले सहरी क्षेत्रमा अपेक्षाकृत परिणाम नआएको उल्लेख गरे । बैठकले सहरी क्षेत्रको जनमतसँग पार्टीलाई अझ बढी जोड्दै लैजानुपर्ने निष्कर्ष निकालेको छ ।
सचिवालय बैठकले सामाजिक सञ्जालहरूको दुरुपयोग गर्दै गलत सूचनाको माध्यमबाट राजनीतिक दल, नेता र प्रधानमन्त्रीविरुद्ध भ्रम फैलाउने प्रवृति उचित नभएको भन्दै गलत कुराको खण्डन र सही विचारको पक्षमा दृढतापूर्वक उभिने निर्णय गरेको उपमहासचिव ज्ञवालीले बताए ।
ज्ञवालीले बीआरआई आफैँमा परियोजना नभएको र यसअन्तर्गत विभिन्न परियोजना सञ्चालन हुने भएकाले बीआरआई अवधारणामा नै ऋण वा अनुदानको विषय जोड्नु गलत भएको बताए । उनले माओवादी अध्यक्ष प्रचण्डले पछिल्लोपटक दिएका अभिव्यक्तिहरू गैरजिम्मेवार रहेको बताए ।
रवि लामिछानेका विषयमा माओवादी अध्यक्ष पुष्पकमल दाहाल 'प्रचण्ड'ले गरेका टिप्पणीहरू अनुसन्धानलाई नै प्रभावित पार्ने प्रकारको रहेको उनले बताए । ज्ञवालीले राजावादीहरूसँग प्रचण्डले हात मिलाउन खोज्नु राजनीतिक विचलन भएको टिप्पणी गरे ।
