राष्ट्रिय एकता अभियानका संयोजक तथा राष्ट्रिय सभा सदस्य वामदेव गौतमलाई नेकपा (एकीकृत समाजवादी) ले पार्टीमा भित्र्याउन जोडबल गरिरहेका छ । 

एकीकृत समाजवादीको स्थायी कमिटी बैठकले वामदेवलाई पार्टीमा भित्र्याउने र वरिष्ठ नेता बनाउने निर्णय गरिसकेको बताइएको छ । वामदेव पनि एकीकृत समाजवादीमा आउने कुरामा सकारात्मक देखिएका छन् ।

एकीकृत समाजवादीका अध्यक्ष माधव कुमार नेपाल र वामदेवबीच भोलि (बिहीबार) भेटवार्ता हुने मिति तय भएको छ । एकीकृत समाजवादीमा प्रवेश गर्ने सन्दर्भमा भोलि दुई नेताबीच छलफल भएर टुङ्गिने बताइएको छ ।

नेता गौतमले एकीकृत समाजवादीले जनताको बहुदलीय जनवाद (जबज) लाई अंगिकार गर्ने शर्तमामात्रै आफू सो पार्टीमा आउने सन्देश पठाएका छन् । एकीकृत समाजवादीमा ठूलो जमात जबजको पक्षधर छ । तर, पार्टीका सम्मानित नेता झलनाथ खनालको जबजलाई स्वीकार गर्न नसकिने मत छ ।

वामदेवले एमालेमा फर्किन ठूलो जोडबल गरेपनि केपी शर्मा ओलीले भाउ नदिँदा अन्ततः उनी एकीकृत समाजवादीमा प्रवेश गर्न लागेका हुन् । वामदेवले आफूहरुलाई एमालेले स्थान नदिएको गुनासो गर्दै आएका थिए । आफूले एमालेमा आउन चाहेको भनी प्रस्ताव राख्दा महासचिव शंकर पोखरेलले अब कोशिस नगर्नु भनेर जवाफ दिएको उनले बताउँदै आएका थिए ।

आफूले धेरै पटक एमाले अध्यक्ष केपी शर्मा ओलीलाई ‘केन्द्रीय सदस्य पनि चाहिँदैन, भैसेपाटी सैबु आवास क्षेत्रको इन्चार्ज बनाइदिनुस्’ भनेर खबर पठाउँदासमेत बेवास्ता गरिएको वामदेवको गुनासो थियो । आफूलाई एमालेले नस्वीकार्ने अन्तिम निचोडमा पुगेका गौतम माधव नेपालको दौराको फेर समातेर समाजवादीमा भित्रिन राजी भएका हुन्।