ठुला भनिएका दलले देश बनाउनै नसक्ने ठोस निर्णयमा पुगेर देश बनाउने अभिभारा बोक्न चम्किएको वैकल्पिक शक्तिको नाराबाट उदायको राष्ट्रिय स्वतन्त्र पार्टी (रास्वपा) अन्ततः विकल्पको भरमा चल्ने अवस्थामा पुगेको छ । 

आफैं कन्तबिजोकको अबस्थामा पुगेको रास्वपालाई आफैं सम्हालिन समेत धौ-धौ भएको छ। अहिले उसका सम्पूर्ण अंग कार्यबहाकको भरमा चलेको छ। अर्थात् जहाँ पनि टेको लगाउनु पर्ने अबस्था देखिएको छ। असनमा टेको लगाएर अड्याएका घरकै हालतमा रास्वपा पुगेको संकेत पाईएको हो। 

स्थापनाको छोटो अवधिमा उदाएको रास्वपा छोटो अवधिभित्रै भताभुङ्गको स्थितिमा पुगेको छ । सञ्चारकर्मबाट उदाएका रवि लामिछानेले २०७९ असार ७ गते रास्वपा घोषणा गरेका थिए । सोही वर्ष मंसिरमा भएको निर्वाचनमा २० सिट जितेर राष्ट्रिय दलको मान्यता पाएको रास्वपा अनेकन विवाद र काण्डमा फसेर खिइँदै आएको छ ।

रास्वपा अहिले कार्यवाहको भरमा चलिरहेको छ । पूर्व उपप्रधान एवं गृहमन्त्रीसमेत रहेका लामिछानेविरुद्ध सहकारी ठगी, संगठित अपराध र सम्पत्ति सुद्धीकरणको मुद्दा दायर भएपछि कार्यवाहक सभापतिको जिम्मा उपसभापति डोल प्रसाद अर्यालले पाएका छन् । लामिछाने गत कार्तिक २ गतेदेखि नै कास्की प्रहरीको हिरासतमा छन् ।

त्यस्तै, रास्वपाको महामन्त्री र प्रवक्तासमेत कार्यवाहको भारमा छ । संस्थापक महामन्त्री एवं प्रवक्ता डा.मुकल ढकाललाई पार्टीले कारबाही गरेको थियो । अहिले कार्यवाहक महामन्त्रीको भूमिकामा कविन्द्र बुर्लाकोटी छन्, उनी सह–महामन्त्री हुन् । सह–प्रवक्ता मनिष झाले कार्यवाहक प्रवक्ताको जिम्मेवारी सम्हालिरहेका छन् ।

लामिछाने २ महिनाभन्दा लामो समयदेखि प्रहरी हिरासतमा रहेपनि उनले कसैलाई कार्यवाह दिएका थिएनन् । सर्वत्र आलोचना सुरु भएसँगै उनले डिपी अर्याललाई कार्यवाहकको जिम्मेवारी दिएका हुन् । उत्साह र उर्जाका साथ उदायको रास्वपा आन्तरिक कलह र विभिन्न काण्डका कारण छोटो अवधिमै विकल्पहरुको हातमा पुगेको छ ।

रवि लामिछानेको राजनीति अदालतमा दायर गरिएका मुद्दाको कसुरले खाईदिने लगभग निश्चित जस्तै छ।