नेपालको एक प्रतिष्ठित औद्यागिक घराना केडिया ग्रुपले मंगलबार काठमाडौंमा एक कार्यक्रमको आयोजना गर्दै पुरुष फ्रेन्चाइज नेपाल भलिबल लिग (एनभीएल)को लोगो सार्वजनिक गरेको छ। 

फ्रेन्चाइज लिगको लोगो र स्लोगन एक कार्यक्रमको आयोजना गरि एक साथ् सार्वजनिक गरिएको हो। 

खेलकुद मन्त्री तेजुलाल चौधरीले लोगोको अनावरण र स्लोगनको सार्वजनिकीकरण गरेका थिए । ‘उचाइको नयाँ उडान’ स्लोगन रहेको नेपाल भलिबल लिगको पहिलो सिजन आगामी २०२५ मा हुने केडिया ग्रुपले जनाएको छ ।

पहिलो संस्करणको लिगमा ६ टोलीको सहभागिता हुने र सिंगल राउन्ड रोबिनका आधारमा खेल हुने आयोजकले जनाएको छ । कार्यक्रममा खेलकुदमन्त्री चौधरीले खेलकुदको माहोल हुँदा पनि पूर्वाधार नहुँदा खेलकुदको सोचेजस्तो विकास हुन नसकेको बताए । 

नेपाल ओलम्पीक कमिटीको निर्वाचनप्रति लक्षित गर्दै उनले अदालतको आदेश समेत नमान्ने प्रवृत्ति खेल संस्थामा देखिएको भन्दै सबैले ऐन नियम मान्नुपर्ने बताए । उनले सरकारको निर्देशन र कानुन नमान्ने खेलकुद संघहरूलाई कडा कारबाही गर्ने चेतावनी दिए । 

९ दिनसम्म चल्ने लिगमा कुल १५ खेल हुने र लिगमा शीर्ष दुई स्थानमा रहने टोलीबीच फाइनल खेल हुनेछ । कार्यक्रममा श्रीलंकामा भएको काभा यू–२० पुरुष भलिबलको रजत विजेता नेपाली यू–२० राष्ट्रिय टोलीका सदस्यलाई नगदसहित सम्मान गरिएको थियो । 

केडिया ग्रुपका कार्यकारी निर्देशक अश्विन केडियाले नेपाली भलिबललाई थप उचाईमा पुर्याउने र खेलकुद मार्फत राष्ट्रको परिचयलाई थप फराकिलो बनाउन केडिया ग्रुप दत्तचित्तले लागेको बताए। 

एनभीएलका एडमिन तथा अपरेसन हेड विकास खेतानले पहिलो संस्करणको लिगमा ६ टोलीको सहभागिता हुने र सिंगल राउण्ड रोविनका आधारमा खेल हुने जानकारी दिए । उनका अनुसार अन्तर्राष्ट्रिय खेलाडीहरूको पनि सहभागिता रहनेछ । हरेक टोलीमा १२ खेलाडी हुने त्यसमा ९ नेपाली र ३ विदेशी खेलाडी हुने खेतानले जानकारी दिए ।

कार्यक्रममा काभा यु २० भलिबल प्रतियोगिताको रजत पदक विजेता टोलीलाई नगद र प्रसंशा पत्रसहित सम्मान गरिएको थियो। 

केडिया ग्रुपका अध्यक्ष विमल केडियाले व्यापार मात्र नभएर समाजका हरेक क्षेत्रका गतिविधिमा सहभागिता जनाउँदै आएका छन्। उनी संबिधान सभा सदस्य समेत हुन्।