पुस २३ गते मंगलबार अबेर बसेको मन्त्रिपरिषद् बैठकले परराष्ट्र मन्त्रालयका कायममुकायम सचिव अमृतबहादुर राईलाई सचिवमा बढुवा गरेको छ। 

राईले आजैदेखि औपचारिकरुपमा सचिवको कार्यभार पनि सम्हालिसकेका छन्। सचिव सेवा लम्साल अवकाशअघि नै बेल्जियमको राजदूतमा सिफारिस भएपछि  राईलाई कामु सचिवको जिम्मेवारी दिइएको थियो। 

लम्सालको सिफारिस संसदीय समितिबाट अनुमोदन भइ राजदूत नियुक्त भएपछि सरकारले उनलाई सचिवमा बढुवा गरेको हो। वरिष्ठतम सहसचिव रहेका राई कामु सचिवको जिम्मेवारी पाउनुअघि मन्त्रालयका प्रवक्ता थिए। उनलाई प्रधानमन्त्री केपी ओलीको चीन भ्रमणको मुखैमा कामुसचिवको जिम्मेवारी तोकिएको थियो। 

झापाका राई सन् १९९६ मा सरकारी सेवामा प्रवेश गरेका थिए।  राई नेपालको २६औँ परराष्ट्र सचिव भएका छन् ।