हालसालै मात्र सरुवा भएका काठमाडौं उपत्यका प्रहरी कार्यालय प्रमुख प्रहरी अतिरिक्त महानिरीक्षक (एआइजी) टेकबहादुर तामाङले बिहीबार त्रिभुवन अन्तर्राष्ट्रिय विमानस्थल सुरक्षा कार्यालयको निरीक्षण गर्दै निर्देशन दिएका छन् ।

प्रहरी अतिरिक्त महानिरीक्षक तामाङले निरीक्षणका क्रममा त्रिभुवन अन्तर्राष्ट्रिय विमानस्थलको सुरक्षा व्यवस्थाले अन्तर्राष्ट्रियस्तरमा राष्ट्रको सुरक्षाको स्तर झल्काउनुका साथै नेपाल प्रहरीको गरिमा समेत अभिबृद्दि गर्ने हुँदा अन्तर्राष्ट्रिय विमानस्थलमा कार्यरत हरेक प्रहरी कर्मचारीले ‘जिब्रोको गरिमा मिठो बोलीमा’ भन्ने नारालाई व्यवहारमा लागु गर्दै हरेक नागरिकको समान सम्मान गर्नुका साथै मानव अधिकारको संरक्षण सँगै नागरिकमैत्री प्रहरीको भूमिका निर्वाह गर्नुपर्ने बताए ।

साथै, डिउटीको समयमा व्यवसायिक मर्यादा विपरितका कार्य गर्ने र प्रहरी बर्दीमा दाग लगाउने कार्य प्रहरी कर्मचारीलाई कुनै पनि प्रकारको क्षम्य नहुने बताए ।

उनले त्रिभुवन अन्तर्राष्ट्रिय विमानस्थल सामान्य नागरिकदेखि अति विशिष्ठ व्यक्तिसम्म साथै आपराधिक मनसाय भएका स्वदेशी÷विदेशी नागरिकको आवागमन हुने प्रमुख स्थान भएकाले सम्भावित खतराको मूल्याङ्कन गरी सोही बमोजिम सुरक्षा योजना बनाई विभिन्न निकायसँग व्यवसायिक समन्वय गरी उच्च मनोवलका साथ प्रहरी जनशक्ति र प्रविधिको प्रयोग पूर्ण व्यवसायिक तवरले गर्न निर्देशन दिए ।

व्यवसायिक र काबिल प्रहरी अधिकृतको परिचय बनाएका तामांगले सुशासन कायम राख्न विशेष जोड दिएका छन्।