दुई वर्षको अन्तरालमा नेपालमा नयाँ-नयाँ गाडी भित्रिन थालेका छन्। नेपालमा ईभी गाडीका नयाँ मोडेल भित्रिने क्रम ह्वात्तै बढेको छ। 

सन् २०२३ को अन्तिमसम्ममा पनि नेपालमा ईभी किन्नेलाई धेरै छनोट उपलब्ध थिएन । तर, त्यसको ठ्याक्कै १ वर्षपछिको समयलाई केलाएर हेर्ने हो भने धेरै नयाँ ब्राण्ड र मोडल थपिए ।

अझ सन् २०२५ को सुरूवातसँगै कार बजारमा एकपछि अर्को नयाँ मोडल आउन थालेको छ । नयाँ वर्ष लागेसँगै नयाँ आउने मोडलहरूको चर्चा पनि भइरहेको छ । अहिलेसम्मको विवरण हेर्दा अबको एक महिनामा करिब आधा दर्जन ब्राण्ड बजारमा थपिने भएका हुन् ।

इभी गाडीको माग र नयाँ मोडेलको चाहना गर्नेको संख्या बढेपछि यसरी नयाँ गाडी भित्रिने क्रमको बढोत्तरी भएको हो। 

आज जनवरी २१ बाट बजारमा अर्को नयाँ मोडल थपिएको छ । सीजी मोटर्सले ६५ र ७० लाख रुपैयाँ मूल्य तोकेर जीएसी एवोन-भी मोडल सार्वजनिक गरेको छ । फिचर लोडेड एसयूभीको रूपमा बजारमा आउन लागेको एवोन-भी बजारको लागि अर्को छनोट हुन सक्ने मोडल मानिन्छ ।

त्यस्तै हुन्डाई क्रेटा ईभी पनि १ महिना भित्रै बजारमा आउने मोडल हो । भारतमा बिक्री सुरू भएको क्रेटा ईभी नेपालमा बहुप्रतिक्षित मोडल मानिएको छ । यसले कस्तो व्यापार गर्छ, त्यो थाहापाउन भने कुर्नु पर्ने हुन्छ । यसको सुरूवाती मूल्य कति पर्ला ? भन्ने चासो धेरैले व्यक्त गरेका छन् । लक्ष्मी इन्टरकन्टिनेन्टल प्रालिले आगामी फेब्रुअरी दोस्रो साताबाट बजारमा बिक्री थाल्ने बुझिएको छ ।

जेको जे-सिक्स अल ह्वील ड्राइभ मोडल पनि तत्कालै नेपाल आउने मोडल हो । यसको लेफ्ट ह्याण्ड ड्राइभ मोडल नेपाल ल्याएर परीक्षण गरिएको थियो । एसपीजी अटोमोबाइल कम्पनीले तीन साता भित्रै जे-सिक्सको अल ह्वील ड्राइभ भर्सन बजारमा ल्याउने छ ।

एमजी एस-५ अर्को बहुप्रतिक्षित मोडल हो । एमजी जेडएस ईभीको विकल्पमा कम्पनीले एस-५ नेपाल ल्याउन लागेको हो । चिनियाँ बजारमा कम मूल्य र निकै पातलो ब्याट्रीको कारण चर्चामा रहेको एस-५ नेपाली बजारमा उत्कृष्ट व्यापार गर्ने अनुमान गरिएको छ । यसको चाँडै बुकिङ खुला हुँदै छ ।

दीपल ई-०७ अर्को साताबाट बजारमा आउने भएको छ । नेपाल आइसकेको दीपल ई-०७ एक कन्भर्टेवल एसयूभी हो । यसलाई आवश्यकता अनुसार केही सेकेन्डमा एसयूभी र पीकअपमा परिवर्तन गर्न सकिन्छ ।

होण्डाई ई:एन वान पनि नेपाली बजारमा आउने छ । स्याकार ट्रेडिङले ल्याउने ई:एन वान मोडल होण्डाको नेपालमा पहिलो इलेक्ट्रीक मोडल हुनेछ ।

भन्सार विभागको तथ्यांकले पनि नयाँ गाडी आयात भएको देखाएको छ भने नेपाली ग्राहकको रोजाईमा पनि इभी गाडी नै पर्न थालेको छ। माग बढेपछि ईभी गाडीका नयाँ मोडेल ह्वारह्वार्ती नेपाल आउन थालेका हुन्।