काठमाडौं‌ महानगरपालिकाले महानगरभित्र रहेका कवाडी गोदाम हटाउने कार्यलाई तीव्रता दिएको छ। 

वस्तीका बिचमा रहेका कवाडी गोदामका कारण जोखिम उत्पन्न भएको भन्दै महानगरले महानगरभित्र रहेका कवाडी गोदाम हटाउने कार्यलाई तीव्रता दिएको हो।

यसैक्रममा महानगरले बिहीबार वडा-२९ अनामनगरमा रहेको कवाडी स्थानीय जनप्रतिनिधि र महानगर प्रहरी बलद्वारा हटाएको छ। महानगर प्रहरीले डोजर प्रयोग गरेर कवाडी गोदाम भत्काएको हो। लोकसेवा आयोगका अध्यक्ष माधवप्रसाद रेग्मीको घरकै आडमा रहेको कवाडीमा महानगरले डोजर चलाएको हो।

गोदाम खाली गर्न पटक-पटक सूचना दिँदा पनि अटेर गरेकाले डोजर प्रयोग गरेर हटाउनुपरेको महानगर प्रहरीले जनाएको छ। यता कवाडी व्यवसायीले भने तीन दिन अघिमात्रै सूचना आएको र गोदाम हटाउने तयारी गर्दा एक्कासी आएर डोजर लगाएको गुनासो गरेका छन्।