ट्राफिक प्रहरीले पछिल्लो समय उपत्यकामा ‘नो हर्न’ अभियान चलाएको छ। अनावश्यक हर्न बजाउने भटाभट कारवाहीमा पर्न थालेका छन्।    

‘नो हर्न’ उल्लंघनमा ५०० सय रुपैयाँ ट्राफिक प्रहरीले असुल गर्दै आएको छ। 

पछिल्लो समय उपत्यकाका तीन जिल्ला काठमाडौं, ललितपुर र भक्तपुरबाट मात्रै ट्राफिक प्रहरीले ‘नो हर्न’ प्रत्येक दिन ५० हजार रुपैयाँभन्दा बढी राजस्व संकलन गर्दै आएको छ ।

ट्राफिक प्रहरी प्रवक्ता एसपी सञ्जयबहादुर राउतका अनुसार, सवारी चालकले जथाभावी र लापरवाही तरिकाले हर्न बजाएको गुनासोका आधारमा ‘नो हर्न’ अभियान थालिएको हो ।

उनी भन्छन्, ‘‘हामीले एक महिनादेखि ‘नो हर्न’ अभियान कडाइका साथ सुरु गरेका छौं । यो अभियान अझै जारी राखिने छ । जथाभावी हर्न बजाउँदा वृद्धादेखि बालबालिकालाई नराम्रो असर परेको गुनासो आएका कारण यो अभियान सुरु गरेका हौँ ।’’

आवश्यकता पर्दा बजाएको ‘हर्न’मा भने ट्राफिक प्रहरीले कुनै कारबाही नगर्ने एसपी राउतको दाबी छ । उनले भने, ‘‘हर्न कहीँ पनि बजाउनु हुँदैन भन्ने होइन । अलिकति जाम हुँदा पनि हर्न बजाउने प्रवृत्ति चालकहरूमा छ । त्यसबाहेक बालबालिका र वृद्धालाई असर हुने र ओभरटेक गर्नसमेत अनावश्यक हर्न बजाउने परिपाटी रोक्न ‘नो हर्न’ अभियान थालिएको हो ।’’

चालकको सचेतनाका लागि माइकिङ तथा प्लेकार्ड प्रदर्शनमा राखिएको एसपी राउतको भनाई छ । उपत्यका ट्राफिक प्रहरी कार्यालयको चालु आर्थिक वर्ष २०८१/०८२ को ६ महिना माघ १३ गतेसम्म १० हजार ८४५ जना सवारी चालक कारवाहीमा परेका छन् ।

त्यसमध्ये पनि सबैभन्दा बढी पुस महिनामा परेका छन् । पुस महिनामा मात्रै ३ हजार १९६ जना सवारी चालक कारबाहीमा परेका छन् ।

मंसिरमा २ हजार ८९० जना तथा कार्तिकमा २ हजार ५५२ जना सवारी चालक कारबाही परेका छन् । चालु आर्थिक वर्षको तीन महिना साउन, भदौ र असोजमा भने २ हजार २०७ जनामात्रै कारबाही परेका थिए ।

चालु आर्थिक वर्षको तुलनामा गएको आर्थिक वर्ष २०८०/०८१ मा हर्न बजाएर ट्राफिक नियम उल्लंघन गर्ने १० हजार १२३ जना सवारी चालक कारबाहीमा परेका थिए । तर, चालु आर्थिक वर्षको ६ महिनामै गत आर्थिक वर्षको भन्दा बढी सवारी चालक कारबाहीमा परेका छन् ।