केपी ओली कप फुटबल प्रतियोगिताको तेस्रो संस्करण आगामी फागुनको दोस्रो सातादेखि सुरू हुने भएको छ।

राष्ट्रिय युवा संघ नेपालको आयोजनामा आगामी फागुन ११ गतेदेखि १९ गतेसम्म केपी ओली कपको तेस्रो संस्करण हुन लागेको हो। युवा संघले बुधवार पत्रकार सम्मेलन आयोजना गर्दै प्रतियोगिताबारे जानकारी दिएको हो।

प्रतियोगितामा ए डिभिजन क्लव र विदेशी गरी कुल १० टोलीले प्रतिष्पर्धा गर्नेछन्। आयोजककाअनुसार प्रतियोगिताको क्वार्टरफाइनल खेल सातदोबाटोस्थित एन्फा कम्प्लेक्स मैदान र सेमिफाइलका खेलहरू त्रिपुरेश्वरस्थित दशरथ रंगशालामा हुने भएका छन्।

युवा संघका अध्यक्ष क्षितिज थेबेले युवालाई खेलकुदमा जोड्ने उद्देश्यअनुरूप युवा संघका संस्थापकको नामबाट प्रतियोगिता आयोजना गर्दै आएको जानकारी दिए।

विजेताले १५ लाख ११ हजार ११ हजार १११ रूपैयां र उपविजेताले पाँच लाख रूपैयांसहित ट्रफी पाउने भएका छन्। प्रतियोगिताकै उत्कृष्ट खेलाडीले एक लाख तथा उत्कृष्ट गोलकिपर, सर्वाधिक गोलकर्ता र उदीयमान खेलाडीले ५० हजार पाउने आयोजकको भनाइ छ।

म्यान अफ दी म्याचले १५ हजार रूपैयाँ पाउने भएका छन्। हरेक खेल जितेबापत पनि टोलीले २५ हजार रूपैयाँ प्राप्त गर्ने युवा संघले जनाएको छ।