ताप्लेजुङको पाथीभरा क्षेत्रमा केबलकार निर्माण ले निम्त्याएको लफडाका कारण पूर्वी नेपालका केही जिल्ला प्रभावित भएका छन्। केहि दिन यतादेखि यातायात ठप्प पारिएको छ। यातायात ठप्प पारेर आन्दोलनकारीले गरेको जक्काजाम खुलाउन यातायात व्यवसायीहरुले सरकारको ध्यानाकर्षण गराएका छन् । 

नेपाल यातायात व्यवसायी राष्ट्रिय महासंघ जिल्ला समन्वय समिति इलामले विज्ञप्ति जारी गर्दै वार्ता र संवादको माध्यममार्फत हल खोज्न संघीय सरकारलाई आग्रह गरेको छ । अनिश्चितकालीन यातायात बन्दले जनजीवन प्रभावित हुनुका साथै यातायात मजदुर, व्यवसायीलाई जीवनयापन गर्नसमेत समस्या परेको समितिको गुनासो छ । 

लामो समय यातायात बन्द हुँदा बैंकको किस्ता तिर्न कठिन हुनेतर्फ सरकारको ध्यानाकर्षण गराउँदै व्यवसायीहरुले २६० प्रतिशतसम्म भन्सार शुल्क तिरेर महँगो ब्याजदरमा ऋण लिई गाडी खरिद गरेको स्मरण गराएका छन् । 

‘यातायात व्यवसायीहरुको यो जटिल अवस्थालाई मध्यनजर गरी सरकार र बन्दकर्ता गम्भीर भई वार्ता र संवादको माध्यमबाट समस्याको समाधान खोज्न राज्य र बन्दकर्ताहरुमा विनम्र अनुरोध गर्दै अविलम्ब यातायात सुचारु गर्ने वातावरण तयार गर्न अनुरोध गर्दछौं’, विज्ञप्तिमा उल्लेख छ । 

पाथीभरा क्षेत्रमा केबलकार निर्माणको विरोध गर्दै आएको मुक्लुमलुङ संघर्ष समिति, केबलकार खारेजी संघर्ष समितिलगायतले गत माघ १५ गतेदेखि अनिश्चितकालीन यातायात बन्द गरेका छन् । माग पूरा नभए प्रदेशभर चक्काजाम गर्ने उनीहरुको चेतावनी छ । यता काठमाडौँ सम्मै आन्दोलनको बाछिटा पर्न सक्ने बताएको छ।