केबलकार वार्ता टोलीको संयोजक पूर्व सिडिओ, आन्दोलनरत टोली झन् चिढियो

सोमबार, माघ २१, २०८१

सरकारले ताप्लेजुङको पाथीभरा केबलकार निर्माणको क्रममा उत्पन्न विवाद समाधानका लागि वार्ता टोली गठन गरेको छ। सरकारले गृह मन्त्रालयका सहसचिव प्रेमप्रसाद भट्टराईको संयोजकत्वमा वार्ता टोली गठन गरेको छ। भट्टराई मोरंगको सिडिओ बाट गृह मन्त्रालय तानिएका अधिकारी हुन्। 

गृह मन्त्रालयबाट जारी गरेको विज्ञप्तिमा वार्ता र संवादको माध्यमबाट समस्या समाधान गर्न सहसचिव भट्टराईको संयोजकत्वमा संघीय मामिला तथा सामान्य प्रशासन मन्त्रालय, संस्कृति, पर्यटन तथा नागरिक उड्डयन मन्त्रालय र सहरी विकास मन्त्रालयका प्रतिनिधि समेत रहेको वार्ता टोली गठन गरिएको जनाएको छ ।

वार्ता टोलीले तत्काल कार्य प्रारम्भ गर्ने र आन्दोलनरत पक्षलाई समेत आन्दोलनका कार्यक्रमहरू फिर्ता लिई संवादमार्फत समस्या समाधानमा सहयोग गर्न गृह मन्त्रालयले अपिल गरेको सहसचिव एवम् प्रवक्ता रामचन्द्र तिवारीले जानकारी दिए।

यता, आन्दोलन गर्दै आएको टोलीले भने सरकारी वार्ता टोलीको औचित्य नरहेको बताएको छ।  राजनीतिक मुद्दा भएकाले कर्मचारी सम्मितिल वार्ता टोली संग वार्ता नै नगर्ने आन्दोलनकारी पक्षले दाबी गरेका छन्।  यसले समस्या सुल्झाउनुको साटो झन् बल्झिने देखिएको छ।

प्रकाशित मिति: सोमबार, माघ २१, २०८१  १२:०७
प्रतिक्रिया दिनुहोस्