पूर्वी नेपालको हिमाली जिल्ला ताप्लेजुङमा निर्माणाधीन पाथीभरा केबुलकार निर्माणसम्बन्धी विवाद समाधानको उद्देश्यले सरकार र आन्दोलनकारीबिच चलिरहेको वार्ता भाँडिएको छ । 

गृहमन्त्रालयका सहसचिव प्रेमप्रसाद भट्टराईको संयोजकत्वको सरकारी वार्ता टोली र नो केबलकार समूहको वार्ता टोली बीच कुरा नमिलेको हो। यसअघि माघ २२ गते वार्ता हुँदा ६ बुँदे सम्झौता भएको थियो । 

आज भएको दुई पक्षीय वार्ता भाँडिन पुगेको छ। अन्तरदलीय मुक्कुमलुङ संरक्षण संघर्ष समितिले अब मन्त्रीस्तरीय वा उच्चस्तरीय वार्ता समितिको माग गरेको छ । 

समितिले कर्मचारीस्तरीय वार्ताबाट समस्या समाधान नहुने भएकाले अब वर्तमान सरकारी वार्ता समितिसँग वार्ता नगर्ने निष्कर्ष निकालेको हो । बैठकमा केबलकार निर्माणमा रहेका समस्याका साथै स्थानीयलाई रोजगार दिन सकिने लगायतका विषयमा छलफल गर्न सकिने सरकारी टोलीबाट प्रस्ताव आएको थियो । 

तर आन्दोलनकारीको तर्फबाट त्यहाँ केबलकार नै बनाउन नहुने भन्दै यसबाहेकका विषयमा छलफल हुन नसक्ने भनेर हिँडेका थिए । यससँगै अहिलेको सरकारी समिति भङ्ग भएको भन्दै अब उच्च स्तरीय वार्ता समिति गठन नगरे भोलिदेखि अर्को चरणको आन्दोलन हुने नो केबलकार पक्षले बताएको छ।