नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले सरकारले संसद छलेर ल्याएका अध्यादेश राष्ट्रिय सभाबाट पारित हुन नदिने बताएका छन् । पार्टीका अगुवा नेता कार्यकर्ताहरूलाई प्रशिक्षणका लागि कर्णाली प्रदेशको राजधानी पुगेका प्रचण्डले पत्रकारहरूसँगको भेटघाटमा यस्तो बताएका हुन् । 

कार्यक्रममा उनले वर्तमान सरकारले संसदबाट ल्याउनुपर्ने कानुनहरू अध्यादेशबाट ल्याएर लोकतन्त्र र सार्वभौम संसदको अवमुल्यांकन गरेको आरोप पनि लगाए । उनले भने, 'प्रतिनिधि सभाको बैठक बोलाइसकेपछि सरकारले विभिन्न कानुनहरू अध्यायदेशबाट ल्यायो । अध्यादेश भनेको त विशेष परिस्थितिमा मात्र ल्याउने हो । यो सरकारका नितान्त बदनियत हो । यसका विरुद्धमा हामीले संसदमा विरोध जनाएका छौँ । यसलाई अहिलेकै अवस्थामा राष्ट्रिय सभाबाट पारित हुन सक्ने अवस्था छैन । हामी राष्ट्रिय सभाबाट पारित हुन दिनेपक्षमा पनि छैनौँ ।'

उनले वर्तमान सरकारको दुई तिहाईको दम्भलाई राष्ट्रिय सभाले काउन्टर गरेको पनि बताए । उनले भने, 'सरकारले दुई तिहाईको अहंकारमा जे गरेपनि पास हुन्छ भन्ने ठानेको थियो । प्रतिपक्षलाई गनेकै थिएन् । तर राष्ट्रिय सभाले सरकारलाई राम्रै चेतावनी दिएको छ । आफ्नो धरातल पनि देखाएको छ । यसबाट सरकारले शिक्षा सिक्नुपर्छ । सबैको मान्य हुने काम गर्नुपर्छ ।'

प्रचण्डले मुलुक आर्थिक हिसावले निकै संकटमा परेको बताए । सरकारले स्थानीय सरकारलाई दिनुपर्ने अनुदानहर कटौतीमा लागिरहेको बताए । उनले भने,'यसैबाट मुलुकको आर्थिक अवस्था नाजुक भएको प्रष्ट हुन्छ । तर स्थानीय सरकारलाई प्रदान गर्ने अनुदान काटिनु भने राम्रो होइन् । यो गाउँको विकासमाथि खेलवाड हो ।'

पूर्वप्रधानमन्त्री समेत रहेका अध्यक्ष प्रचण्डले आफूहरूको ध्यान अहिले सरकारतिर नरहेको बताए । उनले भने,'हाम्रो ध्यान सरकारतिर छैन । अहिलेकै गठबन्धन २०८४ पछिसम्म जाओस् । त्यसमा हाम्रो कुनै चासो छैन । तर, सरकारले गर्ने काम जनताका हित बिपरीत भएमा संसद र सडक दुवै प्रयोग गरेर खबरदारी हामी गरिरहन्छौँ ।'उनले अहिलेको गठबन्धनमा नेकपा एमाले भन्दा नेपाली कांग्रेस तुलनात्मक इमान्दार रहेको बताए ।