नेपाल क्रिकेट संघ (क्यानले) मुख्य प्रशिक्षकका लागि दरखास्त आह्वान गरेको छ। क्यानले शनिबार एक सार्वजनिक सूचना जारी गर्दै मुख्य प्रशिक्षकका लागि आवेदन खुल्ला गरेको हो।

मुख्य प्रशिक्षकका लागि लेभल ३ मान्यता प्राप्त प्रशिक्षकहरुले दर्खास्त दिन सक्ने क्यानको सूचनामा उल्लेख छ। साथै क्यानले सूचनामा कम्तिमा पाँच वर्ष व्यवसायिक क्रिकेट प्रशिक्षकको अनुभव भएको हुनुपर्ने जनाएको छ।

त्यसका लागि क्यानले आइसिसीको पूर्ण सदस्य, प्रथम श्रेणी टोली या आइसिसी सहयोगी सदस्यहरुलाई प्रशिक्षण गरेको हुनुपर्ने उल्लेख गरेको छ।

साथै क्यानले मुख्य प्रशिक्षकलाई आवश्यक सबै सहयोग गर्ने र त्यसका लागि उचित पारिश्रमिकको व्यवस्था गर्ने सूचनामा उल्लेख छ।

यसअघि मुख्य प्रशिक्षक रहेका मोन्टी देशाईको १ फेब्रुअरीमा सम्झौता सकिएसँगै क्यानले उनको सम्झौता ‘रिन्यु’ गरेको थिएन। जसका कारण प्रशिक्षक देशाई कार्यकाल पूरा गरेर बिदा भएका थिए। क्यानले दर्खास्त २८ फेब्रुअरी सम्ममा दिइसक्नु पर्ने जनाएको छ।