नेपाली कांग्रेस नेता डा. शेखर कोइरालाले १५औँ महाधिवेशन विधानमा भएको व्यवस्थाअनुसार समयमै हुनुपर्ने बताएका छन् । विहीबार पार्टीको कार्यक्रममा सहभागी हुने सुर्खेत आएका नेता कोइरालाले पत्रकारसँग संक्षिप्त कुरा गर्दै महाधिवेशनपछि मात्र आमनिर्वाचन हुनुपर्ने बताएका हुन् ।

नेता कोइरालाले भने्, ‘अहिले चलेको हल्लाअनुसार निर्वाचनपछि पार्टीको महाधिवेशन गर्दा नेपाली कांग्रेस धेरै कमजोर हुन्छ, विधानअनुसार ढिलोमा डेढ बर्षमा अधिवेशन गरिसक्नुपर्छ ।’

उनले आगामी महाधिवेशनमा आफू सभापतिको दाबेदार भएको पनि बताए । ‘महाधिवेशन समयमै हुनुपर्छ’ उनले भने, ‘आगामी महाधिवेशनमा म सभापतिको दावेदार हुँ ।’ उनले कांग्रेसमा अहिले गुटउपगुट नरहेको र पार्टी देशभर बलियो रहेको पनि दावी गरे ।

नेता कोइरालाले भने, ‘देशमा सुशासन छँदैछैनभन्दा पनि फरक पर्दैन, आर्थिक अवस्था एकदमै कमजोर भएकाले हामी बेल्ट कसेर अघि बढ्नुपर्छ ।’ उनले आर्थिक अवस्था सुधार, राजनीतिक स्थिरता, सुशासन कायम गराउने उद्देश्यले अहिले दुई ठूला दल काँग्रेस र एमालेबीच सहकार्य भइरहेको बताए ।