नेकपा (माओवादी केन्द्र) का उपाध्यक्ष एवं प्रवक्ता अग्निप्रसाद सापकोटाले सरकार अध्यादेशको पासोमा परिसकेको टिप्पणी गरेका छन् । आज (शुक्रबार) केन्द्रीय समितिले गरेको निर्णयका बारेमा जानकारी दिनको लागि आयोजना गरिएको पत्रकार सम्मेलनलाई सम्बोधन गर्दै उनले सरकार अध्यादेशको पासोमा परेकै कारण २१ दिनसम्म संसद्को काम हातमा लाग्यो शून्यको अवस्थामा रहेको बताए । सरकार अध्यादेशको पासोमा परेकै कारण अहिले संसद आरोप–प्रत्यारोपको थलो बनेको उनको भनाइ छ ।

‘अहिले एक प्रकारले भन्ने हो भने सरकार अध्यादेशको पासोमा परेको छ । २१ दिन भइसक्यो सदनको काम भनेको हाता लाग्यो शून्य । सबैभन्दा महत्वपूर्ण संस्था भनेको सदन हो । त्यो आज प्रतिक्रियात्मक बन्न पुगेको छ । त्यो फगत आरोप–प्रत्यारोपको थलो बनेको छ । सांसदहरु प्रश्न सोध्छन्, प्रधानमन्त्री उत्तर नदिइ हिँड्नुहुन्छ । यो भन्दा लज्जास्पद के हुनसक्छ,’– उनले भने ।

साथै, सरकारले सामाजिक सञ्जाललाई नियमन गर्ने नभएर नियन्त्रण गर्ने हिसाबले विधेयक ल्याएको उनले बताए । नेता सापकोटाले सरकारले महँगी नियन्त्रण गर्न नसकेको, सरकारले कालाबजारीहरुलाई छाडा छोड्दिएको बताए । विपद्मा परेको जनतालाइ राहत प्रदान गर्ने कुरामा सरकारको उपस्थिति नै नदेखिएको उनले बताए । अहिलेको सरकार लज्जाजनक स्थितिमा पुगेको उनको बुझाइ छ ।

साथै, पुष्पकमल दाहाल ‘प्रचण्ड’ नेतृत्वको तत्कालीन सरकारले भ्रष्टाचारको विरुद्धमा धेरै ठूलो पहल कदमी लिएको उनले बताए । प्रचण्ड नेतृत्वको तत्कालीन सरकारले कानुनभन्दा माथि कोही हुन सक्दैन भन्ने शक्तिशाली सन्देश दिएको उनले बताए । तर, वर्तमान सरकार भ्रष्टाचारीहरुको संरक्षक, विचौंलियाहरुको संरक्षक, माफियाहरुको संरक्षकजस्तो भइरहेको उनको आरोप छ ।

दुई तिहाइको कुरा गर्ने सरकार अहिले अध्यादेशको बाटोमा गइरहेको उनले बताए । सरकार निरङ्कुश र अधिनायकवादतिर उन्मुख भइरहेको उनले बताए । ‘सरकार दुई तिहाइको कुरा गर्छ । तर, अध्यादेशबाट शासन चलाउन खोज्छ । दुई तिहाइ छ भनेपछि त राम्रोसँग छलफल गरेर विधेयकहरु पास गरे हुन्छ नि । तर, अध्यादेशको बाटोबाट जान खोजिरहेको छ । पहिलो र दोस्रो ठूलो पार्टी मिलेर सरकार बन्ने भनेको संसदीय व्यवस्थामा स्वभाविक छैन । यो विस्तारै अधिनायकवादतिर जान्छ, निरङ्कुश हुन्छ भन्ने कुरा हिजो जे अनुमान गरिएको थियो, अहिले सरकारका सबै क्रियाकलापले त्यो पुष्टि गरिरहेको छ,’– उनले भने ।