सोसल मिडिया
युनिकोड
विगत तीन दिनदेखि सुनको मूल्य लगातार घटिरहेको छ। गएको बुधबार र बिहीबार घटेको सुनको मूल्य आज थप घटेको हो। नेपाल सुनचाँदी व्यवसायी महासंघका अनुसार आज सुनको मूल्य प्रतितोला दुई हजार दुईसय रुपैयाँ घटेको छ।
सुनको मूल्य बुधबार एक हजार र बिहीबार दुईसय रुपैयाँ घटेको थियो। आज सुनको मूल्य प्रतितोला एक लाख ६८ हजार एकसय रुपैयाँ कायम भएको छ। हिजो सुनको मूल्य तोलाको एक लाख ७० हजार तीनसय रुपैयाँ थियो।
गएको मंगलबार सुनको मूल्य प्रतितोला १ लाख ७१ हजार ३ सय रुपैयाँ पुगेको थियो। जुन मूल्य हालसम्मकै सबैभन्दा उच्च हो। गएको मंसिर तेस्रो साता सुनको मूल्य दुई दिनमै तोलामा साढे १८ हजार रुपैयाँ घटेको थियो। सरकारले भन्सारदर घटाएपछि मंसिर तेस्रो साता सुनचाँदीकै मूल्यमा उच्च गिरावट आएको थियो।
आज चाँदीको भाउ पनि घटेको छ। महासंघका अनुसार आज चाँदीको मूल्य प्रतितोला ३० रुपैयाँ घटेको हो। आज चाँदी तोलाको १ हजार ९ सय १५ रुपैयाँ कायम भएको छ। हिजो चाँदीको मूल्य तोलाको एक हजार नौसय ४५ रुपैयाँ थियो।