नेपाल बार एशोसियसनको चुनावमा सत्तापक्ष र प्रतिपक्षी दुवैले गठबन्धन बनाएका छन् । सत्तारुढ नेपाली काङ्ग्रेस र नेकपा एमालेको गठबन्धनबाट डेमोक्रेटिक लयर्स एशोसियसन (डीएलए)का विजयप्रसाद मिश्र अध्यक्षका उम्मेदवार छन् भने महासचिवमा प्रोगेसिभ लयर्स एशोसियसन (पीएलए) का केदार कोइराला उम्मेदवार छन् ।

विपक्षी गठबन्धनमा नेकपा माओवादी केन्द्र निकट प्रोगेसिभ प्रोफेसनल लयर्स एशोसियसन (पीपीएलए)का रमण श्रेष्ठले उम्मेदवारी दिएका छन् । महासचिवमा भने रास्वपा निकट स्वतन्त्र कानुन व्यवसायी मञ्चका यज्ञमणि न्यौपानेको उम्मेदवारी छ । यस गठबन्धनबाट नेकपा एकीकृत समाजवादीले उपाध्यक्ष लिएको छ ।

बारको चुनाव आगामी चैत २३ मा हुँदैछ । यस चुनावले २५ सदस्यीय नयाँ कार्यसमिति चयन गर्नेछ । चुनावका लागि उम्मेदवारी दर्ताको अन्तिम म्याद फागुन २२ तोकिएको छ । बिहान ११ बजेदेखि अपरान्ह ३ बजेसम्म उम्मेदवारी दर्ता गर्नसकिने निर्वाचन समितिले जनाएको छ ।