सोसल मिडिया
युनिकोड
राष्ट्रियसभामा पूर्वराजा ज्ञानेन्द्र शाहको गतिविधिले प्रवेश पाएको छ । आइतबारको बैठकमा सांसदहरुले पूर्वराजाको सक्रियताप्रति आपत्ति जनाएका छन् ।
प्रतिपक्षी नेकपा (एकीकृत समाजवादी)का सांसद जयन्ती राईले ‘प्रतिगामी तत्व’ कुर्लिन थालेको बताइन् ।
“फेरि पनि प्रतिगामी तत्व ब्युँझिदै छन् । संविधानको उल्लंघन गर्न खोज्दैछन्,” उनले भनिन्, “लडेर प्राप्ति गरेका अधिकार खोस्न चाहँदैछन् । संघीय लोकतन्त्रमाथि धावा बोलिरहेका छन् ।”
उनले प्राप्त उपलब्धि गुमाउनसक्ने खतराप्रति सजग हुनुपर्ने बताइन् । “प्राप्त गरेका उपलब्धि नगुमाउन सजग बनौं । संविधान कार्यान्वयनमा अघि बढौं,” उनले भनिन् । नेकपा (माओवादी केन्द्र)का सांसद जगप्रसाद शर्माले राजाको वंश विनाश गरेकाहरुले नै नाटक मञ्चन गरिरहेको आरोप लगाए ।
“अहिले तथाकथित प्रतिगामी शक्तिहरु राजा फर्काउने, जसले राजाको वंश विनाश गरेका हुन् । तीनैले राजा फर्काउने नाटक मञ्चन गरिराखेका छन् ,” उनले भने ।
उनले संविधान, व्यवस्थाविरुद्धको हर्कतलाई सरकारले किन नियन्त्रण गर्न नसकेको भनी सोधे । “यो अराजकतालाई नियन्त्रण गर्न सरकार किन सकिरहेको छैन ? प्रतिपक्षको कुरा किन सुनिरहेको छैन ?,” उनको प्रश्न छ । प्रदर्शन नियन्त्रण गर्न सरकारसँग माग गरे ।
राष्ट्रिय जनमोर्चाका सांसद तुलप्रसाद विश्वकर्माले गणतन्त्रको विकल्प राजतन्त्र हुन नसक्ने बताए । सत्तामा बसेका दलले जनताको माग सम्बोधन गर्न नसक्दा राजावादीले टाउको उठाएको बताए ।
“सत्तामा बसेका पार्टीहरुले देश र जनताको आवाजालाई सुन्न सकेनौं । अभाव, गरिवी, महँगी, वेथितिलाई सम्बोधन गर्न सकेनौं । त्यसकारण यस्ता तत्वहरु बेलाबेलामा टाउको उठाउने काम गरिरहेका छन्,” उनले भने । जनताको जीवनलाई सहज बनाउने, सुशासन कायम गर्न सरकारले काम गर्नुपर्ने उनको भनाइ छ ।
उनले संघीयता महँगो भएको भन्दै प्रदेश खारेजीको माग गरे । पूर्वराजा शाह आज पोखराबाट काठमाडौं फर्कदैछन् । आज काठमाडौंका विभिन्न ठाउँबाट उनको स्वागतमा प्रदर्शन भइरहेको छ ।
