सोसल मिडिया
युनिकोड
राष्ट्रिय जनमोर्चाले पूर्वराजा ज्ञानेन्द्र शाहका गतिविधिबाट गणतन्त्र र धर्मनिरपेक्षताका साथै जनताको आन्दोलन र संघर्षबाट प्राप्त उपलब्धिमाथि खतरा बढेर गएको बताएको छ । देशमा प्रतिगमनको खतरा धेरै बढेर गएको कुरा बराम्बर गर्दै आएको पनि जनमोर्चाले जनाएको छ ।
जनमोर्चाका अध्यक्ष चित्रबहादुर केसीले एक विज्ञप्ति जारी गर्दै प्रतिगमनका खतराविरुद्ध लोकतन्त्र, गणतन्त्र र धर्मनिरपेक्षताका पक्षधरहरूलाई कार्यगत एकता हुन पर्नेमा जोड दिएका छन् । उनले राजावादीको गतिविधि बनाइरहेका बेला राष्ट्रिय सबै परिवर्तनकारी शक्तिलाई कार्यगत एकता हुने आह्वान गरेका छन् ।
लोकतन्त्रवादी र गणतान्त्रिक शक्ति बिचको ऐक्यबद्धता र कार्यगत एकताबाट नै देशलाई पश्चगमन वा निरंकुश राजतन्त्रतर्फ धकेल्ने प्रतिगामीहरूको प्रयत्नलाई असफल पार्न वा पराजित गर्न सम्भव हुने जनमार्चाको भनाइ छ ।
‘देशमा प्रतिगमनको खतरा बढेको बेलामा गणतन्त्र र धर्मनिरपेक्षता पक्षधर शक्तिको कार्यगत एकता वा गठबन्धनको आवश्यकताप्रति हामीले अहिले पनि जोड दिन्छौं’, विज्ञप्तिमा भनिएका छन् । गठबन्धन वा कार्यगत एकताहरू २०४६ वा २०६२–६३ सालका जनआन्दोलनहरूमा गरिएको केसीले विज्ञप्तिमा जनाएका छन् ।
‘राजावादीका साथै केपी शर्मा ओलीले अपनाएका प्रतिगामी नीतिका कारणले देश प्रतिगमन र अधिनायकवादतिर जाने खतरा बढेको बेलामा पनि पाँच दलीय गठबन्धन बनेको थियो,’ विज्ञप्तिमा भनिएको छ, ‘त्यो गठबन्धनका कारणले ओलीको प्रतिगमनलाई पराजित गर्नु सम्भव भएको थियो । तर प्रचण्डको अवसरवादी वा पदलोलुप क्रियाकलापका कारणले प्रतिगमनका विरुद्ध बनेको गठबन्धन टुट्न गयो र त्यसबाट पनि राजावादीलाई बल पुग्यो ।’
