नेपाल स्टक एक्स्चेन्ज लिमिटेड (नेप्से)को प्रमुख कार्यकारी अधिकृत (सिइओ) पदमा नियुक्तिका लागि अर्थ मन्त्रालयअन्तर्गत गठित सिफारिस समितिले नेप्सेको सिइओका निम्ति पाँचजना सर्टलिस्ट प्रकाशित गरेको छ । 

जस अनुसार चुडामणि चापागाईं, नारदकुमार लुइँटेल, पूर्णप्रसाद आचार्य, बद्रीप्रसाद प्याकुरेल र हेमन्त बस्याल सर्टलिस्टमा परेका छन् । समितिले प्रमुख कार्यकारी अधिकृत पदका लागि संक्षिप्त सूचीमा छनोट भएका आवेदकहरूलाई व्यावसायिक कार्ययोजनाको प्रस्तुतीकरण र अन्तर्वार्ताका लागि उपस्थित हुन सूचना जारी गरेको छ ।

आवेदकहरूलाई नागरिकता, शैक्षिक योग्यता र कार्य अनुभवको पुष्टि गर्ने सक्कल कागज प्रमाणहरू लिई उपस्थित हुन समितिले भनेको छ । सर्टलिस्टमा परेकाहरूको अन्तर्वार्ता चैत ६ गते अर्थात् आगामी बुधबार बिहान ७ बजेदेखि अर्थ मन्त्रालयमा हुने समितिले जनाएको छ ।