सुशासन कायम गर्न र मितव्ययी बन्न बारम्बार अर्ति उपदेश दिंदै आएका प्रधानमन्त्री केपी शर्मा ओलीले मन्त्री र सचिवका विदेश भ्रमणलाई खुकुलो बनाई दिएका छन्। नेपालको प्रतिनिधित्व हुनै पर्ने कार्यक्रममा त भ्रमण हुनु स्वाभाविकै हो तर अनिवार्यता नभएका भ्रमणलाई पनि प्रधानमन्त्री ओली ले लालमोहर लगाईदिने गरेका छन्। 

आफ्नो सरकारका मन्त्रीलाई लगाम लगाउने मामिलामा प्रधानमन्त्री ओली पूरापुर चुकेका छन्।  मन्त्रीका प्रेमिका सहित उपसचिवका श्रीमती समेतलाई राज्यको खर्चमा विदेश सयर गराउने बन्दोबस्ती मिलाउने सम्मको सूचना पाएर पनि प्रधानमन्त्री ओलीले त्यसलाई अनदेखा गरेर सुशासनको विषयमाथि आफैं तातोपानी खन्याएका छन्। 

थाइल्यान्डको औपचारिक भ्रमणमा निस्कनु अघि चैत १८ गते बसेको क्याबिनेटले एक साथ् तीन मन्त्रीको विदेश भ्रमण स्वीकृत गरेको छ। चैत २६ र २७ गते हुने बिमस्टेकको मन्त्रीस्तरिय कार्यक्रममा कृषी मन्त्री रामनाथ अधिकारी सचिव सहितलाई लिएर विदेश जाँदैछन्। 

त्यस्तै, वैशाख २ गते खेलकुद मन्त्री तेजुलाल चौधरी अमेरिका जाँदैछन्। पर्यटन राज्यमन्त्री अरुण चौधरीलाई दक्षिण कोरिया जान अनुमति दिईएको छ भने सामान्य प्रशासन मन्त्री राजकुमार गुप्ता बैशाख ८ गते अमेरिका जाँदैछन्।