काठमाडौं महानगरपालिकाका नगरप्रहरीले वडाध्यक्षहरूलाई महानगर प्रवेशमा रोक लगाएका छन् ।

महानगरबाट निलम्बित प्रमुख प्रशासकीय अधिकृत सरोज गुरागाईं कार्यालयमा पुग्नुअघि गेटमा तैनाथ नगरप्रहरीले वडाध्यक्षलाई रोकेका हुन् ।

मेयर बालेन शाहको निर्देशनमा नगरप्रहरीले वडाध्यक्षहरूलाई प्रवेश गर्न दिएको छैन । नगरप्रहरीको कदमपछि वडाध्यक्ष र कर्मचारीहरू आन्दोलनमा उत्रिएका छन् ।

महानगरपालिकाका प्रमुख प्रशासकीय अधिकृत गुरागाईं आज चैत २१ कार्यालय जाँदै छन् । गुरागाईंलाई मेयर बालेनले  ०८१ पुस १४ गतेदेखि निलम्बन गरेका थिए।

काठमाडौं टावर १२ तलाको बनाउने भनिएको थियो । तर, त्यसलाई १९ तलाको बनाउन स्वीकृति दिएको आरोपमा गुरागाईंलाई कार्यालयमा उपस्थित हुन रोक लगाइएको छ ।

महानगरले गुरागाईंमाथि छानबिन गर्न तीन समिति बनाएको थियो । तर, संघीय मामिला तथा सामान्य प्रशासन मन्त्रालयले गुरागाईंलाई नै काम गर्ने वातावरण मिलाउन भनेको छ । कर्मचारी भने गुरागाईकै पक्षमा खुलेका छन्।