काठमाडौं महानगरपालिकाका प्रमुख कार्यकारी अधिकृत सरोज गुरागाईं महानगर प्रवेश गरेपछि तगारो हाल्न कस्सिएका महानगर प्रहरीका प्रमुख राजु पाण्डेले तिनै कार्यकारी समक्ष जम्लाहात गर्दै माफी मागेका छन्। 

गुरागाईंलाई कार्यालय छिर्न नदिन मेयर बालेन साहको आदेश छ भन्दै बिहिबार धकामुक्कामा उत्रिएका पाण्डे आज शुक्रबार घाममा साग गले झैँ गरि फतक्कै गलेका हुन्। 

कर्मचारीको सहयोगमा प्रमुख कार्यकारी अधिकृत कार्यालय छिरेपछि यतिबेला नगरप्रहरी प्रमुख पाण्डेमाथि कारवाही गर्नुपर्ने आवाज उठ्न लागेको छ। र कानूनले उनलाई चलाउने जिम्मा कार्यकारीलाई नै दिएको पनि छ। 

नगरप्रहरीले गुरागाईंको गाडी ह्वील लक गरे पनि उनी स्वयं कार्यकक्षमा छिर्न सफल भएका थिए। वडाध्यक्षहरूले ताला तोडेर उनलाई कार्यकक्ष प्रवेश गराएका थिए।

गुरागाईंलाई कार्यालय प्रवेश गर्न नदिन प्रयास गर्ने क्रममा नगरप्रहरी प्रमुख पाण्डे विवादमा तानिएका छन्। आफू विवादमा तानिएको र कारवाहीमा पर्ने डर भएपछि नगरप्रहरी प्रमुख पाण्डेले शुक्रबार कार्यकारी अधिकृत गुरागाईंलाई भेटेर बिहीबारको घटनाप्रति माफी मागेका हुन् ।

उनले आफूले आदेश पालना गरेको भन्दै त्यसबाट पर्न गएको अप्ठेरोप्रति माफी मागेका हुन्। स्रोतका अनुसार पाण्डेले गुरागाईंलाई भेटेर आफूले आदेश मात्रै पालना गरेको र दुःख दिने नियत नभएको जिकिर गरेका थिए। पाण्डेलाई कारबाही गर्न भित्र भित्रै तयारी थालेपछि उनी हतार-हतार कार्यकारीको कार्यकक्षमा पुगेर माफी मागेका हुन्। पाण्डेले भने आफूले माफी नमागेको भनेका छन्।