हङकङमा आजदेखि सुरु भएको चारदेशीय ट्वान्टी–२० शृंखलामा नेपाली क्रिकेट टिमले सहज जित निकालेको छ । नेपालले बुधबार भएको पहिलो खेलमा कतारविद्धर आठ विकेटको सहज जित निकालेको हो ।
हङकङको मोङ कोकमा भएको खेलमा कतारले प्रस्तुत गरेको १५२ रनको लक्ष्य नेपाली टिमले १७ ओभरमा दुई विकेट गुमाएर पूरा गर्यो ।
नेपालको जितमा ओपनरद्वय कुशल भुर्तेल र आसिफ सेखले आक्रामक सुरुआत गरेका थिए । भुर्तेलले १९ बलमा चार चौका र तीन छक्कासहित ३८ रन बनाउँदा आसिफ सेखले २१ बलमा चार छक्कासहित ३३ रन बनाए ।
यी दुईले पहिलो विकेटका निम्ति ५.४ ओभरमा ८१ रनको साझेदारी गर्दै नेपाललाई आक्रामक सुरुआत दिलाएका थिए ।
यस्तै, कप्तान रोहितकुमार पौडेलले ३७ र बसिर अहमेदले ३० रन थपे । कतारका मुजिब–उर–रेहमानले दुई विकेट लिए ।
त्यसअघि टस हारेर ब्याटिङमा आएको कतारले निर्धारित २० ओभरमा पाँच विकेट गुमाएर १५१ रनको योगफल खडा गरेको थियो ।कतारका कप्तान इक्रामुल्लाह खानले ५४ रन बनाए । साहजैब जमिलले ३१, मुजिब–उर–रेहमानले २० र मोहम्मद इर्सादले १८ रन थपे ।
नेपालका करण केसी, सोमपाल कामी, नन्दन यादव, गुल्सन झा र ललितनारायण राजवंशीले समान एक विकेट हात पारे । नेपाली राष्ट्रिय टिमबाट नन्दनको यो ‘डेब्यू’ खेलसमेत हो । नेपालले अब बिहीबार कुवेतसँग प्रतिस्पर्धा गर्ने तालिका छ ।
