रविले प्रतिनिधिसभामा एकसरो मन माझ्ने, कांग्रेसले चित्त नबुझाए राजीनामा दिने

बिहीबार, जेठ ३, २०८१

उपप्रधान एवम् गृहमन्त्री रवि लामिछानेले सहकारी ठगी प्रकरणमा आफ्नो नाम मुछिएको भन्दै सदनमा आफ्नो कुरा प्रष्ट पार्ने भएका छन् । आज अपरान्ह ४ बजे बस्ने प्रतिनिधिसभाको बैठकमा गृहमन्त्री लामिछानेलाई बोल्न दिनको लागि प्रमुख प्रतिपक्षी दल तयार भएको हो ।

बैठक विहान ११ बजेको लागि बोलाईएको थियो । तर, प्रधानमन्त्री पुष्पकमल दाहालले सदनको अवरोध हटाउनका लागि प्रमुख प्रतिपक्षी दल नेपाली कांग्रेसका नेताहरुसँग सघन छलफल गरेपछि र कांग्रेस सदन खुलाउन लचिलो बन्ने भएपछि सभामुख देवराज घिमिरेलाई फोन गरेर बैठक केही घण्टा पर सार्नको लागि आग्रह गरेका थिए ।

सोहीअनुसार सभामखुले प्रतिनिधिसभाको बैठक ४ बजेको लागि डाकेका छन् । बैठकमा गृहमन्त्री लामिछानेले बोल्ने बताईएको छ । सो क्रममा कांग्रेसको तर्फबाट कुनै अवरोध नहुने बुझिएको छ । प्रधानमन्त्री दाहाल र गृहमन्त्री लामिछानेबीचको छलफलमा सहकारी ठगी प्रकरणबारे संसदीय छानबिन समिति बनाउने विषयमा समझदारी बनेको छ ।

प्रधानमन्त्री दाहालले गृहमन्त्री लामिछानेलाई छानबिन समितिलाई १५ दिनको म्याद दिएर काम गर्न दिने र त्यतिञ्जेलसम्म जिम्मेवारीबाट अलग बस्न सुझाएका छन् । प्रधानमन्त्री दाहालको प्रस्तावमा लामिछाने सकारात्मक रहेको बुझिएको छ । प्रधानमन्त्री दाहाल र गृहमन्त्री लामिछानेबीच यस्तो समझदारी बनेको हो भने लामिछानेले आजै संसद्मा आफ्नो सम्बोधन सकिएलगत्तै राजीनामा घोषणा गर्नसक्ने बुझिएको छ ।

यस्तै, गिरिबन्धु टि–स्टेटको विषयमा नेपाली कांग्रेसले सदनमा कुरा नउठाउनेगरि दलहरुबीत समझदारी बन्न लागेको छ । उक्त प्रकरणमा सर्वोच्च अदालतको फैसला आइसकेकोले कांग्रेसले सो विषय सदनमा प्रवेश नगराउनेगरि बालुवाटारमा समझदारी बनेको छ । 

प्रकाशित मिति: बिहीबार, जेठ ३, २०८१  १३:५९
प्रतिक्रिया दिनुहोस्