नेपाली कांग्रेसका महामन्त्री गगन थापाले गृहमन्त्री रवि लामिछानेले संसद्‌लाई सम्बोधन गर्दा आफू गृहमन्त्री हुँ भन्ने बिर्सिएको टिप्पणी गरेका छन्।

आइतबारको प्रतिनिधिसभा बैठकपछि पत्रकार सम्मेलन गर्दै महामन्त्री थापाले गृहमन्त्री लामिछाने संसदमा बोल्दा टेलिभिजनको प्रस्तोता जसरी प्रस्तुत भएको बताएका हुन्।

सरकारको कार्य सञ्चालन नियमावलीले गृहमन्त्रीलाई ठूलो जिम्मेवारी दिएको भए पनि लामिछानेले त्यसलाई बिर्सिएको उनको भनाइ थियो।

लामिछाने सदनमा गृहमन्त्रीको रुपमा बोलेको हो कि टेलिभिजन प्रस्तोताको रुपमा बोलेको भन्ने कुरामा आफू अलमलमा परेको महामन्त्री थापाले बताए।

उनले भने,’संसदमा बोल्दा उहाँ गृहमन्त्री हुनुभो कि टेलिभिजनको प्रस्तोता हो भन्ने कुरामा थोरै अलमल भयो। किनकि गृहमन्त्री हो भन्ने कुरा माननीय गृहमन्त्रीले बिर्सनु भयो कि भन्ने लाग्यो। टेलिभिजन कार्यक्रम प्रस्तोता हुँदै गर्दाखेरी प्रश्नहरु सोध्ने विषयहरु उठाउने कुरा स्वभाविक हो। तर गृहमन्त्रालय भनेको त ठूलो जिम्मेवारी हो नि। हाम्रो सरकारको कार्य सञ्चालन नियमावलीले पनि गृह मन्त्रालयलाई, त्यसमाथि पनि उपप्रधानमन्त्री, कतिधेरै महत्वपूर्ण जिम्मेवारी दिएको छ।’